Dhoobley(Idaacadda Sanguuni)-Kooxda kubadda cagta Manchester City ayaa iska xaadirisay finalka Champions League oo ay kula ballantay Inter Milan, kaddib markii ay si xun ugu tunteen Real Madrid lugta labaad ee semi-finalka Champions League, taas oo ay ku karbaasheen 4-0, halka lugtii horena ay kusoo kala baxeen 1-1, taas oo wadarta natiijada ka dhigaysa in Manchester City ay kusoo baxday 5-1.
Manchester City ayaa siday doonto ka yeeshay Real Madrid oo u muuqanaysay carruur la keenay garoon oo lala ciyaarsiiyey xiddigo waaweyn, waxaanay awoodi waayeen inay kubadda isku-dhiibaan, is-difaacan amaba weerar qaadaan.
Xiddigaha duqoobay ee Real Madrid ayaa ay da’du kusoo baxday oo ay runtu u itaal-sheegtay, waxaana ugu sii liitay Luka Modric oo illoobay sidii kubadda loo ciyaarayay iyo Karim Benzema oo ku dhax dawakhay difaacyahanno u ciyaaraya sida khadka dhexe oo kale.
Bernardo Silva ayaa laba gool ku dilay qaybtii hore, waxaana goolka koowaad uu ahaa mid qurux badan oo uu kubadda ka helay Kevin De Bruyne, halka midka labaadna uu madax ku celiyey kubbad ay iska soo difaaceen ciyaartoyda Real Madrid.
Carlo Ancelotti ayaa la filayay in uu isbeddel ku samayn doono kooxdiisa qaybta labaad, laakiin waxay lasoo laabteen isla xiddigihii ku dhibbanaa garoonka 45kii daqiiqadood ee hore.
Beddelkii ugu horreeyey ayaa noqday Luka Modric oo baxay isaga oo ka tuugaya tababarihiisa in sharaftiisa la badbaadiyo oo garoonka laga saaro.
Eder Militao ayaa isku qoray liiska goolasha, waxaana uu isku qabtay kubbad oo doonayay inuu difaaco balse kusii dhacday oo goolhaye Thibaut Courtois dhinaca qaldan u dirtay.
Haaland ayaa kubbad uu kula baxay goolka waxa isku ballaadhiyey Courtois oo diiday in ay ceebtu kusii socoto kooxdiisa, waxayse kubaddu u dhaaftay dhinaca goolkiisa iyadoo dallacantay oo kusii dhacday birta sare kaddibna koorne lagu siiyey Man City.
Julian Alvarez oo beddel kusoo galay ayaa waqtigii dheeraadka ahaa ee lagu daray ciyaarta kubbad loo hordhigay goolka, waxa uu dhinaca ka dhigay Courtois, kuna hubsaday shabaqa, sidaas ayaanay ciyaartu ku noqotay 4-0 ay guushu ku raacday Man City, halka isku-darka natiijada labadii lugood ay Man City kusoo baxday 5-1.
Manchester City ayay u tahay markii labaad ee ay u gudubto finalka Champions League, waxaana sannadkii 2021 ay iskugu yimaaddeen Chelsea oo koobka gool madi ahaa kaga qaadday, halka xilli-ciyaareedkii hore ay ku hadheen semi-finalka oo ay Real Madrid ku reebtay.
Finalka Champions League ayaa waxa isku ballansaday Man City iyo Inter Milan oo June 6 loogu goleyn doono magaalada Istanbul.
