Dhoobleey(Idaacadda Sanguuni)-Manchester City oo saddexda dhibcood si raaxo leh kaga heshay Watford oo marti ugu ahayd garoonka Etihad, kaddib markii ay kaga adkaatay 5-1, kulan ka tirsanaa horyaalka Premier League.
Qeybta hore ee ciyaarta ayaa lagu kala nastay 3-1 ay ku hoggaamineysay kooxda martida loo ahaa ee Manchester City.
Daqiiqadii 4-aad kooxda Manchester City ayaa hoggaanka u qabatay dheesha waxaana 1-0 ka dhigay Gabriel Jesus kaddib markii uu ka caawiyay saaxiibkiis Zinchenko.
23 daqiiqo marka ay dheesha mareysay Gabriel Jesus oo markan ay caawin kaga timid Kevin De Bruyne ayaa wuxuu ciyaarta ka dhigay 2-0 ay ku hoggaamineysay kooxda Man City.
Daqiiqadii 28-aad kooxda Watford ayaa dhalisay gool waxaana 2-1 ka dhigay dheesha laacibkooda Hassane Kamara kaddib markii uu ka caawiyay saaxiibkiis Emmanuel Dennis.
Rodri oo caawin ka helay Gabriel Jesus ayaa wuxuu markan ciyaarta ka dhigay 3-1 ay ku hoggaamineysay kooxda martida loo ahaa ee Manchester City.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
49 daqiiqo marka ay ciyaarta ahayd kooxda kubadda cagta Man City ayaa loo dhigay rigoore waxaana gool ka dhigay Gabriel Jesus, dheesha ayaa waxay sidaas ku noqotay ciyaarta 4-1.
Daqiiqadii 54-aad kooxda Manchester City ayaa dheereysatay hoggaaminta dheesha kaddib markii uu 5-1 ka dhigay Gabriel Jesus oo kulankan wacdarro ka dhigay, waxaana ka caawiyay saaxiibkiis Kevin De Bruyne.
Ugu dambeyntii ciyaarta ayaa waxay ku dhammaatay 5-1 ay kaga adkaatay Manchester City, kooxda Watford oo marti ugu ahayd garoonka Etihad, kaddib guushan City ayaa ku hoggaamineysa horyaala Ingiriiska 80 dhibcood, 4 dhibcood ayeey ka sareysaa Liverpool oo kaalinta labaad fadhisa.
