(Dhoobley(Idaacadda Sanguuni).. Luis Suarez ayaa shaaca ka qaaday in Tababaraha Kooxda Barcelona ee Ronald Koeman uu u sheegay xagaagii 2020 inuusan ku jirin qorshihiisa kooxda, kaddib markii uu Taleefoonka ka soo wacay, intaas inuu u sheegana ay ku qaadatay kaliya 40 ilbiriqsi.
34-sano jirkaan ayaa dib isaga weeraray Koeman kulankii dhowaa oo ay Atletico Madrid 2-0 uga adkaatay kooxdiisii hore ee Barcelona, waxaana markii uu gool ka dhaliyey Catalans uu sameeyey dabaal-deg muujinaya in Taleefoon laga soo wacay si uu arrintaas u xusuusiyo Tababaraha reer Holland.
“Wicitaankii Koeman ee ahaa in la ii sheego in aanan ku jirin qorshihiisa waxa uu socday kaliya 40 ilbiriqsi, ma’ahan hab lagu macsalaameeyo halyeey.” ayuu yiri Suarez intii lagu guda jiray wareysi uu siiyay Twitch channel-ka Gerard Romero.
“Marka hore wuxuu ii sheegay inaanan ku jirin qorshihiisa, kaddibna waxa uu ii sheegay in haddii aanan ka bixin qandaraaskayga aan ka hor tagayo Villarreal.
“Waxa uu waayay shaqsiyaddii uu si cad iigu sheegi lahaa haddii uusan i doonayn ama haddii ay dhab ahaantii ahayd in aanay i doonayn Kooxda”. ayuu hadalkiisa ku daray Weeraryahanka Atletico Madrid ee Luis Suarez.
