Dhoobley(Idaacadda Sanguuni)-Kooxda Liverpool ayaa xiiso weyn u qabta saxiixa weeraryahanka Newcastle United, Alexander Isak, si ay u xoojiyaan weerarkooda ka hor bilaabashada xilli ciyaareedka cusub, sida uu shaaciyay Express Sport.
Arne Slot, tababaraha cusub ee Reds, ayaa durba kooxda kusoo kordhiyay saxiixyo waaweyn oo ay ka mid yihiin Jeremie Frimpong iyo Florian Wirtz oo ka yimid Bayer Leverkusen, iyo Milos Kerkez oo laga keenay Bournemouth. Sidoo kale, Hugo Ekitike ayaa lagu soo daray kooxda isagoo kasoo wareegay Eintracht Frankfurt.
Haatan, Isak ayaa noqday bartilmaameedka ugu weyn ee kooxda iyadoo wararka sheegayaan in weeraryahanka reer Sweden uu dalbanayo mushahar gaaraya £300,000 todobaadkii haddii uu heshiis cusub u saxiixayo Newcastle. Mushaharkaasi wuxuu aad uga sarreeyaa xadka mushaharka ee Newcastle — taasoo fursad fiican u ah Liverpool oo awoodi karta iney la timaaddo dalab rasmi ah.
Eddie Howe, tababaraha Newcastle, ayaa Isak ka saaray ciyaartii saaxiibtinimo ee ay la yeesheen Celtic, taasoo sii xoojisay saadaasha ah inuu ka tagi karo kooxda. Liverpool ayaa dhanka kale heleysa dhaqaale ku filan haddii Darwin Nunez iyo Federico Chiesa ay kooxda ka tagaan. Labaduba waxaa la sheegay inay qaadan jireen mushahar ku dhow £150,000 todobaadkii.
Inkasta oo Liverpool ay horey u ahayd koox aan si fudud u bixin mushaharro waaweyn, haddana Fenway Sports Group (FSG), milkiilayaasha kooxda, ayaa hadda u muuqda kuwo diyaar u ah inay la jaanqaadaan suuqa casriga ah, si ay ula tartamaan kooxaha waaweyn.
Isak, oo 24 jir ah, ayaa la rumeysan yahay inuu diyaar u yahay inuu u dhaqaaqo koox weyn oo Champions League ka ciyaarta, waxaana Liverpool uu u arkaa meel uu ku hormarin karo xirfaddiisa.
