Lionel Messi mise Erling Haaland? Pep Guardiola Oo Doortay Xiddiga Uu La Doonayo Abaal-marinta Ballon d’Or

By
admin
-
0
109

Dhoobley(Idaacadda Sanguuni)-Tababaraha kooxda kubadda cagta Manchester City ee Pep Guardiola ayaa la weydiiyey ciyaartoyga uu siin lahaa abaal-marinta xiddiga adduunka ee Ballon d’Or ee 30ka bishan October lagu bixin doono magaalada Paris ee waddanka France, taas oo ay ugu cadcad yihiin Erling Haaland iyo Lionel Messi.

Labadan ciyaartoy ayaa soo qaatay xilli-ciyaareed wanaagsan oo guulo waaweyn ay gaadheen, waxaase ay abaal-marinta Ballon d’Or ku kala-calaf qaadi doonaan Isniinta toddobaadka dambe.

Haaland ayaa waxa uu Man City u saftay 53 ciyaarood oo uu u dhaliyey 52 gool xilli-ciyaareedkii 2022/23, waxaana uu kula guuleystay saddex koob oo ah Champions League, Premier League iyo FA Cup.

Lionel Messi ayaa isaguna waxa uu xulka qaranka Argentina u qaaday Koobkii Adduunka ee 2022 lagu qabtay waddanka Qatar, sidoo kalena PSG ayuu la qaaday horyaalka Ligue 1 ka hor intii aanu ka tegin ee aanu Maraykanka u wareegin.

Pep Guardiola oo hore tababare ugu soo noqday Lionel Messi waqtigii uu joogay Barcelona, haddana Erling Haaland tababare ugu ah Man City, ayaa la weydiiyey midka uu abaal-marinta Ballon d’Or siin lahaa, waxaanu ku jawaabay: “Waa in uu Haaland ku guuleysto. Haa, waa inuu isagu ku guuleysto sababtoo ah waxa aanu ku guuleysanay saddex koob, isaguna wuxuu dhaliyey 50 gool. Laakiin dabcan haddii aad i weydiiso xilli-ciyaareedkii ugu xumaa ee Messi, waxa uu noqonayaa xilli-ciyaareedka ugu fiican ee ciyaartoyda kale. Labadooduba way u qalmaan, maxaa kale ee aan odhan karaa?”

RELATED ARTICLESMORE FROM AUTHOR