Dhoobley(Idaacadda Sanguuni)-Kobbie Mainoo, khadka dhexe ee Manchester United, ayaa beeniyey wararka sheegaya in uu fariin dhaliil ah u diray tababare Ruben Amorim, kadib qoraal uu soo dhigay baraha bulshada.
Mainoo, oo 20 jir ah, ayaa caan noqday xilli ciyaareedkii 2023/24 markii uu United ka caawiyay inay ku guuleysato FA Cup, isaga oo dhaliyay gool muhiim ah kulankii final-ka ee Manchester City. Si kastaba, dhaawacyo, hoos u dhac qaab ciyaareed iyo fursado yar oo uu ka helay tababaraha cusub Amorim ayaa saameyn ku yeeshay horumarkiisa.
Amorim, oo xilka qabtay bishii November 2024, ayaa hore u sheegay in Mainoo uu yahay qayb muhiim ah oo kooxda ka mid ah, balse waxa uu ku adkeystay inuu laacibku “u dagaallamo booskiisa.”
Intii lagu jiray fasaxa xulalka, Mainoo ayaa soo dhigay Instagram sawir laga qaaday filimka Whiplash, taas oo dad badan u arkayeen dhaliil uu ku durayo tababaraha. Balse markii taageerayaal ay su’aal ka keeneen, laacibku waxa uu si kooban ugu jawaabay ereyga: “Caadi iska Dhiga”, isaga oo meesha ka saaray fasiraadaha la xiriira Amorim.
United ayaa ku soo laaban doonta Premier League 14-ka September, iyagoo la ciyaaraya Manchester City garoonka Etihad.
