Dhoobley(Idaacadda Sanguuni)-Tababare Jurgen Klopp ayaa si cad uga hadlay haddii uu cabsanayo shaqadiisa Liverpool ka dib guuldaradii xasuuqa aheyd ee ka soo gaartay Napoli kulankoodii furitaanka Champions League.
Liverpool ayaa lagu jiid-jiiday magaalada Napoli kulankii furitaanka Group A ee Champions League iyadoo kooxda Talyaaniga ay Reds ku xasuuqday 4-1, waxaana taas sii dheereyd in Napoli ay rigoore iska sii qasaarisay.
Liverpool ayaa si xun ku bilaabatay xilli ciyaareedkan iyagoo durbaba wajahay hal guuldarro iyo seddex barbaro lixdii kulan ee ugu horeysay xilli ciyaareedka Premier League.
Jurgen Klopp ayaa kulankii Napoli ka dib, la weydiiyay haddii uu ka baqayo in loo eryo sidii ay Chelsea u ceyrisay Thomas Tuchel, wuxuu ku jawaabay:
“Maya xaqiiqdii cabsi kama qabo, xaalkeyga sidaas waa ka duwan yahay.
“Milkiilayaasheena waa kuwa degan oo iga filanaya inaan xal u helo dhibaatadaan, kamana fekerayaan in shaqsi kale uu Liverpool ka saarayo marxaladaan.”
Klopp oo hogaaminaya Reds xilli ciyaareedkiisii 7aad ayaa wajahaya habaarka ka ku habsata xilli ciyaareedka 7aad ee koox walba uu soo maamulay. Wuxuu ku fashilmay kooxda Mainz xilli ciyaareedkiisii 7aad si la mid ah Borussia Dortmund.
