Dhoobley(Idaacadda Sanguuni)-Boqorka Dalka Urdun Boqor Cabdallaha labaad ayaa ugu baaqay beesha caalamka inay qaadaan tallaabo degdeg ah si loo joojiyo musiibada bini’aadanimo ee ka jirta deegaanka Gaza.
Hadaladaan ayaa yimid xilli uu boqorka ku sugnaa magaalada Berlin ,iyadoo shir jaraa’id ay si wadajir ah u qabteen boqorka iyo ra’iisul wasaaraha Jarmalka Olaf Scholz.
Boqorka ayaa amaanay taageerada Jarmalka ee xalka labada dal iyo sida wanaagsan ee ay uga jawaabeen qorshaha Carabta ee dib u dhiska Gaza.
Boqorka ayaa sidoo kale carrabka ku adkeeyay muhiimadda ay leedahay in laga shaqeeyo xasilinta gobolka oo ay ku jiraan taageeridda Suuriya iyo dadaallada lagu ilaalinayo amnigeeda, xasilloonida, iyo wadajirkeeda dhuleed, isagoo xusay in Urdun ay rajaynayso inay mar kale aragto Suuriya oo xasilloon.
Dhankiisa, Chancellor Scholz ayaa sheegay in Jordan iyo Jarmalku ay leeyihiin xiriir dhow oo iskaashi iyo saaxiibtinimo, kaas oo socday in ka badan 70 sano.
