Dhoobleey(Idaacadda Sanguuni)-West Ham iyo Chelsea ayaa kulmaya fiidka hore ee caawa kulan xaasaasi ah oo saamayn ku yeelanaya kaalinta afraad ee horyaalka Premier League.
Kulankan lagu magacaabo London Derby ayaa xilli ciyaareedkan xiise gaar ah leh, waxaanay Blues iyo West Ham oo isku dhibco ah ay mid walba u dagaallami doontaa in ay si buuxda ugu fadhiisato kaalinta afraad, halka kooxda laga badiyaana ay suurtogal tahay in ay u degto kaalinta toddobaad oo ay xataa kasii hoos marto Liverpool iyo Tottenham.
Chelsea ayaa ku qasban in aanay wax dhibco ah lumin ciyaartan, si ay usii xajisan karto kaalinteeda afraad oo ay farqiga goolasha ku hayso, laakiin West Ham ayaa iyaduna ahayd koox natiijooyin wanaagsan soo bandhigaysay xilli ciyaareedkan oo rajo weyn ka qabta in booskeeda kaalinta afraad ee ay muddada kusoo jirtay ay dib ugu laaban doonto.
Labadan kooxood oo taariikhiyan kulamadoodu yihiin kuwo aan waxba la iskula hadhin, waxa gacanta sare yeelatay inta ugu badan Chelsea oo guuleysatay 51 ciyaarood, halka West Ham ay badisay 42 jeer iyo 22 kale oo ay barbarro galeen.
Xogta kulanka
Ciyaarta: West Ham vs Chelsea
Tartanka: Horyaalka Premier League
Waqtiga: 7:30pm – Saacadda Geeska Afrika
Wararkii ugu dambeeyey labada kooxood
West Ham waxa ka maqan laacibkeeda Craig Dawson oo laba kaadh oo digniin ah qaatay ciyaartii ugu dambaysay, waxayse filaysaa in uu dib ugu soo laabto Jesse Lingard oo ah xiddiga loo nisbaynayo in uu sabab u yahay in kooxdu ay timaaddo halkan qaybtii dambe ee xilli ciyaareedka. Waxa kale oo usoo laabanaya Hammers labada ciyaartoy ee Aaron Cresswell iyo Arthur Masuaku.
Chelsea waxa dhinaceeda dhaawac ka ah Mateo Kovacic oo uu tababare Tuchel xaqiijiyey in uu dhaawacan yahay, halka ay kooxdu qiimayn doonto taam ahaanshaha Thiago Silva.
