Dhoobley(Idaacadda Sanguuni)-Tababaraha kooxda Chelsea ee Graham Potter ayaa sameeyay qirasho weyn kaddib kulankii ay shalay Arsenal kala kulmeen guuldarrada kaga soo gaadhay Stamford Bridge.
Gunners ayaa hoggaanka dib uga soo ceshaday Manchester City kaddib saddex dhibcood oo ay u qalmeen oo ay kala laabteen Bridge kaddib gool uu dhaliyay daafaca dhexe ee Gabriel Magalhaes.
Graham ayaan wax dhibaato weyn ah ka muujin guuldarrada kooxdiisa soo gaadhay isaga oo qirtay inay Arsenal ka horreyso wakhtigan oo ay u qalmeen inay guuleystaan.
Dhinaca kale Potter ayuu kasoo yeedhay hadal ka cadhaysiiyay jamaahiirta kooxdiisa oo ah inay xiddigaha kooxdiisu waxkasta oo dadaal ah ku bixiyeen kulankaas walow ay iska caddayd in laga maamushay kulanka oo dhan.
GP oo la hadlayay BT Sports ayaa yidhi “Waxaan filayaa inaanu la ciyaarnay koox ku jira dhab ahaan wakhti kalsooni ay dareemayso, waxaad arki kartaa dhibcaha ay haystaan, sidaas darteed amaan ayay mudan yihiin”.
“Wiilashu waxkasta ayay ku bixiyeen kulanka. Dhawr xaaladood ayaanu helnay, fursado afar v afar ah iyo kuwo afar v saddex ah balse dhammaysrirka dambe ayaa naga maqnaa”.
“Guud ahaan waxaan filayaa inay Arsenal u qalantay inay guuleysato, walow goolku uu ahaa mid niyad jab leh haddana guud ahaan kulanka wax cabasho ah kama qabno natiijada”.
