Dhoobley(Idaacadda Sanguuni)-Halyeeyga kooxda Manchester United ee Gary Neville ayaa u muuqda mid kasoo dabcay aragtidii uu hore uga haystay kooxda ku guuleysanaysa horyaalka Premier League sanadkan.
Arsenal ayaa haatan siddeed dhibcood hoggaanka kaga haysa Manchester City oo kulan baaqi u yahay iyadoo kulamo tirsani xilli ciyaareedka ka hadhsan yihiin.
Manchester City ayaa shalay 4-1 ku xasuuqday kooxda macalin Jurgen Klopp ee Liverpool oo marti u ahayd balse waxa wakhti kooban kaddib guul 4-1 ah iyaduna kaga jawaabtay Arsenal oo Leeds United jiidhay.
Gary Neville ayaa hore u diidanaa aragtida ah in Arsenal horyaalka ku guuleysanayso xilli ciyaareedkan isagoo markasta u badinayay Manchester City.
Neville ayaa haatan u muuqda mid tanaasul sameeyay wuxuuna sheegay inuu hadda 50/50 u arko fursadaha labada kooxood balse haddii Arsenal toddobaadka dambe kasoo badiso Liverpool oo ay martiyayso horyaalku gacanteeda ku jiro.
“Dhab ahaan waxaan filayay in Arsenal wakhtigan marka lasoo gaadho dhibco lumin doonto oo aysan joogi doonin halka ay joogaan balse hadda waxaan filayaa inay 50/50 tahay”.
“Waxkasta anigu kuma xidhayo kulanka Liverpool balse tababarahayagu wuxuu odhan jiray haddii xilligan sanadka aad ku guuleysato Anfield waxaad ku guuleysanaysaa horyaalka”.
“Haddii Arsenal Anfield tagto oo guuleysato, waxaan odhanayaa hubaal waa horyaalkoodii”.
