Dhoobley(Idaacadda Sanguuni)-Halyeeyga kooxda Manchester United ee Rio Ferdinand ayaa doortay saddex kooxood oo uu ku dhawaad hubo inay afarta sarre ee Champions League ku dhammaysan doonaan.
Boosaska Champions League loogu soo baxo ee Premier League ayaa durba kululaanaya walow ay Arsenal iyo Man City u muuqdaan kuwo tartanka horyaalka ku jira.
Arsenal ayaa haatan laba dhibcood hoggaanka kaga haysa Man City kaddib 12 kulan oo Premier League ah halka ay shan dhibcood kala saaraan kooxaha Tottenham, Newcastle United, Man United iyo Chelsea.
Ferdinand ayaa saddexda kooxood ee uu hubo inay afarta sarre ku dhammaysan doonaan ka dhigay Arsenal iyo Man City oo uu ku lamaaniyay kooxdiisii hore ee Man United.
Red Devils ayaa Axadii guul 1-0 ah ka gaadhay West Ham United kaddib gool uu dhaliyay Marcus Rashford, kooxda Erik Ten Hag oo aan toddobaadyo kahor aaminaad badan lagu qabin ayaa u muuqata mid haatan qaabaysmaysa.
“Waxay noqon doonaan Arsenal, Man City iyo Man United, iyagu waa saddexda kooxood ee aan gurigayga ku sharadtami lahaa haatan” ayuu yidhi Rio.
“Kaddib mida afraad ma dooran karo, Newcastle ayaa iman karta oo booskaas qaadan karta”.
Hadalka Rio ayaa ah mid uusan gabi ahaanba ku xusin kooxaha Chelsea iyo Liverpool oo aan xilli ciyaareedka sidii ugu fiicnayd ku bilaaban.
