(London) 14 Agoosto 2020. Ciyaaryahan Willian ayaa ugu dambeyn dhammaystiray ku biiristiisa Kooxda Arsenal, kaddib markii uu beeca xorta ah kaga tagay Chelsea.
Xiddiga reer Brazil ayaa xaqiijiyey inuu isaga tagay Blues 9 bishan Agoosto kaddib markii uu iska diiday hesheshiis labo sanadood ah oo ay doonayeen inuu ku sii joogo garoonka Stamford Bridge ee galbeedka Magaalada London.
Ciyaaryahan Willian ayaa doonayey dhankiisa heshiis intaa ka badan, kooxda Arsenal ayaana markiiba u soo bandhigtay heshiis saddex sanadood ah, laacibka laftiisa ayaana doonayey inuu sii joogo Magaalada London sidaas darteed goordhow ayaa la xaqiijiyey inuu ku biiray Arsenal.
Tababare Mikel Arteta ayaa doonaya inuu ka faa’iideysto qibradda ciyaaryahankan reer Brazil ee Willian.
Waxa uu todobo sanadood ku qaatay Chelsea, 32-sano jirkaana ayaana kooxdaas kula guuleystay labo Premier League, FA Cup, League Cup iyo Europa League.
Waxa uu Willian kooxda Blues u saftay 339 kulan, waxaana uu u dhaliyey 63 gool, isagoo u sameeyey 56 caawin 7 xilli ciyaareed oo uu la joogay.
Waxa uu Kooxda Arsenal u saxiixay heshiis saddex sanadood ah, waxaana uu Gunners u xiran doonaa lambarka 12-aad sida ay kooxdu xaqiijisay.
Gool FM.
