Dhoobley(Idaacadda Sanguuni)-Kooxda kubadda cagta Real Madrid ayaa u dhaqaaqaysa saxeex aanay hore usii qorshaynin oo uu ku qasbayo dhaawac soo gaadhay xiddiga reer Brazil ee Vinicius Jr oo waxyeello kasoo gaadhay kulankii Celta Vigo ee Jimcihii uu dillaacay muruqa bowdada ee lugta midig, taas oo keenaysa in uu muddo bil iyo badh ah ka maqnaado garoomada.
Illaa dhamaadka bisha October ayaa la filayaa in Vinicius Jr uu kusoo laaban doono garoomada, inkasta oo ay wax walba isbeddeli karayaan, hase yeeshee Real Madrid ayaa waxay ka baqaysaa in dhaawacu saamayn ku yeelan karo qaabkiisa.
Sida ay warbaahinta Spain sheegayso, Real Madrid ayaa waxay isku dayi doontaa inay Manchester United ka doonato beddelka Vinicius Jr, waxaanay doonayaan weeraryahanka reer France ee Anthony Martial oo ay qaab amaah ah uu la socdo dookh iib ah ay isku dayi doonaan.
Carlo Ancelotti oo hore u sheegay in aanu wax ciyaartoy ah la saxeexan doonin, ayaa waxa uu hadda ku riixayaa kooxdiisa in loo keeno weeraryahan cusub waqtiga kooban ee ka hadhsan suuqa iibka ciyaartoyda maadaama iyadoo marka horeba aanay haysanin dhaliye uu haddana ka dhaawacmay Vinicius Jr oo ay isku hallaynayeen.
Si kastaba ha ahaatee, Martial ayaan la hubin in ay Manchester United ogolaan doonto inay amaah ku bixiso, inkasta oo uu ogsoon yahay in uu boos la’aan noqon doono oo weerarka dhexe uu Erik ten Hag ka ciyaarsiin doono Rasmus Hojlund ama Marcus Rashford.
