(Dhoobley(Idaacadda Sanguuni). Weeraryahanka kooxda kubadda cagta Juventus ee Cristiano Ronaldo ayaa lagu soo warramayaa inuusan qorsheyneyn sii joogista naadigiisa haddii ay ku guuldarreysato inay Champions League usoo baxdo fasal ciyaareedka dambe.
Majaladda Tuttosport ee kasoo baxda magaalada Turin ayaa baahisay in kooxaha Paris Saint-Germain iyo Manchester United ay yihiin bardhammaadyada xiga ee uu u dhaqaaqi doono xagaagan haddii uu soo af-jarayo waayihiisa kubadda cagta dalka Taliyaaniga.
Ronaldo ayaa Juve kula jira qandaraas dhici doona dhammaadka xilli ciyaareedka dambe ama xagaaga 2022, waxaase si aad ah loola xiriirinayaa inuu xagaagan ka tagi doono Serie A haddii ay kooxdiisa usoo bixi weyso tartanka horyaallada Yurub.
Si kastaba ha ahaatee, kabtanka Portugal ayaa shan jeer hore ugu guuleystay Champions League, waxaana afar ka mid ah uu la qaaday Real Madrid halka kan kalena uu kula guuleystay Man United.
