(Dhoobley(Idaacadda Sanguuni). Kulammo qeyb ka ah Isbuuca 10-aad horyaalka Premier League ee xilli ciyaareedkan ayaa galabta la ciyaaray, iyadoo kooxaha waa weyn qaarkood ay ciyaareen.
Kooxaha Manchester City, Liverpool, iyo Chelsea ayaa ugu madax fiiqnaa kooxaha galabta ka ciyaaray horyaalka Premier League iyadoo ay natiijooyin layaab leh ay ka soo baxeen.
Kooxda Chelsea ayaa 0-3 kaga soo adkaatay naadiga Newcastle United oo ay ku booqatay garoonka St. James’ Park, Blues goolasheeda waxaa u kala dhaliyay xiddigaha kala ah Reece James oo 2 gool ah, iyo Jorginho.
Dhinaca kale kooxda reer London ee Crystal Palace ayaa guul dahabi ah ka soo heshay 10 xiddig oo naadiga Manchester City ah, kaddib markii ay kaga soo adkaatay 0-2, goolasha kulankan ka dhashay waxaa kala dhaliyay Conor Gallagher iyo Wilfried Zaha.
Naadiga Brighton & Hove Albion oo marti ku ahayd garoonka Anfield ayaa waxay taako u dhigtay kooxda Liverpool kaddib markii ay ku kala baxeen barbardhac 2-2 ah, goolasha Reds waxaa u kala dhaliyay xiddigaha kala ah Jordan Henderson iyo Sadio Mané.
Hadaba halkaan hoose ka eeg guud ahaan natiijooyinka kulammadii galabta laga ciyaaray horyaalka Premier League,:-
Newcastle United 0-3 Chelsea.
Manchester City 0-2 Crystal Palace.
Liverpool 2-2 Brighton & Hove Albion.
Burnley 3-1 Brentford.
Watford 0-1 Southampton.
