Dhoobley(Idaacadda Sanguuni)-Kooxda kubadda cagta Real Madrid ayaa guul weyn oo 4-0 ah kasoo gaadhay Girona oo ay marti u ahaayeen oo saf sharafeed u samaysay ka hor intii aanay ciyaartu bilaabmin.
Real Madrid oo ku guuleysatay horyaalka LaLiga ayaan wax naxariis ah u gelin Granada, waxaanay u dhaadhicisay heerka labaad oo ay xilli-ciyaareedka dambe ka ciyaari doono.
Arda Guler iyo Brahim Diaz ayaa sida ay doonaan ka yeelay Granada oo markii ay ciyaartu dhamaatay ay ciyaartoydeedu garoonka dhaxdiisa oohin la fadhiisteen, halka xiddigaha Real Madrid ay iyaguna farxad wadaagayeen oo ay salaan diirran is-daafanayeen.
Kubbad uu Brahim Diaz kasoo dhigay dhinaca midig ayuu daqiiqaddii 38aad hoggaanka Real Madrid ugu dhiibay Fran Garcia, taas oo uu lUka Modric khibrad ugu sii daray oo uu uga dul-booday isaga oo difaaca khiyaameeyey.
Waqtigii dheeraadka ahaa ee lagu daray qaybta hore ayuu Arda Guler gool qurux badan hoggaanka ugu sii dheereeyey kooxdiisa, waxaana lagu kala nastay 2-0.
Markii lagu soo noqday qaybta labaad ayuu Brahim Diaz kubbad kasoo qaatay badhtamaha garoonka oo uu goysmo kusoo silciyey dhawr ciyaartoy, kaddibna saddex hor ordayey ayuu waabiyey oo dhinac iskugu yaacay, ka hor intii aanu darbad lugta midig ah goolka ku toogan oo aanu shabaqa ku hubsanin.
Sagaal daqiiqadood kaddib ayuu Brahim Diaz kubbad uu ka helay Luka Modric waxa uu ku maamulay xerada ganaaxa, kaddibna inta uu dhinaca kale ula jeedsaday ayuu darbad xooggan oo lugta bidix ah shabaqa sudhay.
Arda Guler iyo Joselu ayaan ka faa’iidaynin fursado dhawr ahaa oo ay heleen, waxaanay ciyaartu kusoo dhamaatay 4-0 ay guushu ku raacday Real Madrid.
