Dhoobley(Idaacadda Sanguuni)-Kooxda Barcelona ayaa war cad ka heshay xidhiidhka kubadda cagta Yurub ee UEFA xilli kiis musuq-maasuq oo lagu eedaynayay muran lagu galinayay ka qayb qaadashadooda Champions League ee xilli ciyaareedka dambe.
Barca ayaa loo haystaa wax is-daba marin uu sameeyay Jose Maria Enriquez Negreira kaas oo hore u ahaa madaxweyne ku xigeenka garsoorka Spain sheegayna inuu lacago ka qaatay Barcelona intii u dhaxaysay 2001 ilaa 2018.
Waaxda la dagaalanka musuqa ee Spain ayaa baadhitaan ku wada Barcelona halka UEFA dhinaceeda baadhis gaar ah wado.
Si kastaba, shan nin oo ka socda gudida xidhiidhka kubadda cagta Spain ayaa dib u eegis ku sameeyay dhokumentyada ay Barcelona soo gudbisay ee Champions League kaga ciyaarayso xilli ciyaareedka dambe.
Sida uu sheegayo wargeyska Mundo Deportivo, guddidaas ayaa aqbalay xogta Barca soo gudbisay siiyayna liisanka ay kaga qayb galayaan CL 2023-24.
