Dhoobley(Idaacadda Sanguuni)-Kooxda kubadda cagta Barcelona ayaa iska lumisay fursad ay ugu sii dhowaan lahayd ku guuleysiga horyaalka waddanka Spain ee LaLiga oo ay 15 dhibcood oo nadiif ah hoggaanka ku qaban lahayd, waxaana la degtay naadiga ay isku gobolka yihiin ee Girona oo ku celisay barbarro goolal la’aan ah.
Xiddigaha waaweyn ee Barcelona ayaa fursado fiican oo ay heleen ka faa’iidaysan waayey iyadoo Ronald Araujo uu nasiibku diiday oo kubbad uu goolka ku leexiyey uu soo celiyey goolhaye Gazzaniga ka hor intii aanay xariiqda si buuxda uga gudbin.
Muuqaallada dhinacyada ee kaamirooyinka ayay qaarkood shaki gelinayeen in uu goolkaasi dhashay, balse saacadda goolka ayaan qaylinin, sidoo kalena looma baahanin in VAR laga soo hubiyo.
Raphinha ma aysan ahayn habeenkiisii sababtoo ah kubbad uu dhinaca midig kala soo galay oo uu ku toogtay goolka ayaa birta soo qaniintay, waanay hormartay goolka.
Natiijadan ayaa ka dhigan in Barcelona ay 13 dhibcood oo nadiif ah ka horreyso Real Madrid oo kaalinta labaad kaga jirta horyaalka LaLiga isla maarkaana garoonkeeda Santiago Bernabeu ay ku garaacday Villarreal oo marti u ahayd.
