Xulka Argantina oo iska xaadiriyay Semi-final-ka Koobka Adduunka kaddib markii rigoorayaal kaga soo gudbeen dhigooda Netherlands.

0
139

Dhoobleey(Idaacadda Sanguuni)-Xulka qaranka Argantina ayaa iska xaadiriyay Semi-final-ka Koobka Adduunka kaddib markii rigoorayaal 3-4 kaga soo gudbeen dhigooda Netherlands. Kaddib ciyaar leysku daalay oo ku dhammaatay barbaro 2-2 ah.

Qeybta hore ee ciyaarta ayaa lagu kala nastay 0-1 uu ku hoggaamineyay xulka qaranka Argantina.

Daqiiqadii 35-aad xulka Argantina ayaa hoggaanka u qabtay dheesha kaddib markii uu 0-1 ka dhigay Nahuel Molina, waxaana si qurux badan kaga caawiyay Lionel Messi.

Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.

73 daqiiqo marka ay ciyaarta mareysay Argantina ayaa loo dhigay rigoore waxaana gool u badelay Lionel Messi ciyaarta ayaana sidaas ku noqotay 0-2.

Laakiin daqiiqadii 83-aad xulka Netherlands ayaa dhaliyay gool, waxaana ciyaarta 1-2 ka dhigay Wout Weghorst, kaddib markii uu ka caawiyay saaxiibkiis Steven Berghuis.

Daqiiqadii 90 + 11-aad xulka Netherlands ayaa dhaliyay goolka barbardhaca waxaana markale 2-2 ka dhigay laacibkooda Wout Weghorst oo caawin ka helay saaxiibkiis Teun Koopmeiners.

90-ka daqiiqo ee ciyaarta loogu tala galay ayaa waxay ku soo idlaatay barbardhac 2-2, waxaana lagu daray 30 daqiiqo oo dheeri ah.

Ugu dambeyntii ciyaarta ayaa ku dhammaatay barbardhac 2-2 ah, waxaana rigoorayaal 3-4 ah ugu soo gudbay wareega xiga ee afar dhammaadka xulka qaranka Argantina.