Dhoobley(Idaacadda Sanguuni)-Ciyaartoyda kooxda kubadda cagta Manchester United ayaa ka degay magaalada London tababare Erik ten Hagna wuxu soo saaray liiska xiddigihiisa kulanka adag ee Chelsea ee maanta kuwaas oo uu ka maqan yahay xiddiga Portugal ee Cristiano Ronaldo.
CR7 oo lagu eedeeyey in uu diiday inuu beddel kusoo galo kulankii Tottenham ee Arbacadii ayaa sidii ay kooxdu xalay sii sheegtay, waxa laga reebay ciyaartoyda u safray London ee waajahaya Chelsea, hase yeeshee waxa uu Ten Hag dib u helay oo taam buuxa noqday Christian Eriksen oo xanuunsanayay labadii ciyaarood ee ugu dambeeyey, inkasta oo uu kaydka fadhiyey ciyaartii Arbacadii oo uu beddel kusoo galay saddexdii daqiiqadood ee ugu dambeeyey.
Harry Maguire iyo Brendon Williams oo tababarka kusoo laabtay ayaa iyagana laga reebay liiska ciyaartoyda kulanka Chelsea, maadaama ay wali u baahan yihiin inay taam noqdaan kaddib waqti dheer oo ay dhaawac ku maqnaayeen.
Anthony Martial ayaan wali taam ahayn, waxaanay taasi ka dhigan tahay, in weerarka ay kusoo wada bilaaban doonaan Marcus Rashford, Jadon Sancho iyo Antony, halka Lisandro Martinez iyo Raphael Varane ay iyaguna ka mid ahaayeen xiddigaha ka ka duulay garoonka diyaaaradaha Manchester Airport oo lagu sawiray iyaga oo diyaaradda sii koraya.
Wargeyska MEN ayaa daabacay liiska ciyaartoyda Manchester United ee kulanka Chelsea, waxaana ka maqan liiska Anthony Elanga, waxaase ku jira da’yarka Zidane Iqbal.
