Dhoobley(Idaacadda Sanguuni)-Jamaahiirta kubadda cagta ayaa codkooda ku doortay safka ugu fiican taariikhda horyaalka Premier League xilli ay kooxaha waaweyn ee horyaalkaas soo mareen safaf kala duwan oo tayo sarreysa.
Afarta dhinac ee tartamayay ayaa kala ah Man United 1999 oo ah kooxdii saddexleyda kusoo guuleysatay, Man City 2018 oo ah kooxdii gaadhay 100-ka dhibcood ee Premier League, Liverpool 2020 oo ah safkii ugu horreeyay ee Reds Premier League u qaaday iyo Arsenal 2004 oo horyaalka guuldarro la’aan ku qaaday.
Man United iyo tababare Sir Alex Ferguson ayaa sagaashamaadkii markii Premier League la sameeyay 1992 ahaa awooda ugu weyn iyagoo qaaday shan kamida toddoba horyaal oo qabsoomay kahor bilaawgii qarnigan.
Coddayntan ayay booska labaad kasoo wada galeen Arsenal 2004 oo lagu xasuusto inaysan xilli ciyaareedka dhan guuldarro arag iyo Liverpool 2020 halka ay booska saddexaad soo gashay Manchester City xilli ciyaareedkeedii boqoleyda.
