Dhoobleey(Idaacadda Sanguuni)-Goolhaye Bernd Leno ayaa si rasmi ah uga tagay Arsenal wuxuuna ku biiray kooxda u soo dalacday xilli ciyaareedkan horyaalka Premier League ee Fulham.
Leno oo booskiisa Arsenal u waayay Ramsdale ayaa go’aansaday inuu isaga dhaqaaqo Emirates Stadium si uu u helo waqti uu ku ciyaaro iyadoo dhamaadka sannadkan la ciyaarayo Koobka Adduunka.
Fulham ayaa goolhayaha Jarmalka ku iibsatay lacag gaareysa 8 milyan ginni oo kaash ah, waxaana jira lacago kale oo dheeri oo ku xirnaan doona qaab ciyaareedkiisa.
Bernd Leno ayaa u saxiixay kooxda Fulham qandaraas seddex sannadood ah oo ku dhamaanaya bisha Juun 2025, iyadoo goolhayaha qiyaar loo siiyay inuu sannad kale ku darsan karo.
30 jirkaan oo u hadlayay TV-ga Fulham ayaa yiri: “Waxay ii tahay dareen cajiib ah inaan halkaan joogo. Ma sugi karo inaan koox tababar la qaato oo aan la ciyaaro.
“Neef ayaa iga soo fuqday madaama wax walba haatan la dhameeyay. Aad ayaan ugu faraxsanahay inaan halkaan imid. Waqti ayay yara qaadatay laakiin ugu danbeen waa la dhameeyay taas ayaana muhiim ah.”
