Dhoobleey(Idaacadda Sanguuni)-Kooxda reer Spain ee Barcelona ayaa kula dagaalameysa kooxaha Paris Saint-Germain iyo Juventus saxiixa kubad sameeyaha Manchester City ee Bernardo Silva, marka uu furmo suuqa kala iibsiga xagaaga soo aadan.
27 jirkan ayaa muhiim ka ah qorshaha tababare Pep Guardiola ee kooxda Manchester City xilli ciyaareedkan, kaddib markii uu dhaliyay 11 gool, wuxuuna caawiyay 5 gool kale, 43 kulan oo uu saftay tartamada oo dhan.
Xiddiga reer Portugal ayaa dhowr bilood kahor ku xaqiijiyay kaddib wareysi uu bixiyay inuu ku fikirayo inuu ka tago garoonka Etihad xagaagii lasoo dhaafay, taasoo keentay in kooxo badan oo Yurub ah ay isku diyaariyaan saxiixiisa.
Sida ay shaaca ka qaadeen wararka ka imaanaya gudaha Spain kooxaha Barcelona, PSG, iyo Juventus ayaa wada doonaya saxiixa Bernardo Silva oo qandaraaskiisa naadiga Manchester City uu dhacayo sanadka 2025.
Wararka ayaa waxay intaas ku darayaan in Barcelona ay muddo dheer daba socotay ciyaaryahanka, ayna u dhaqaaqi doonto saxiixiisa haddii xiddiga reer France ee Ousmane Dembélé, uusan u cusbooneysiin qandaraaskiisa maamulka, dhamaadka bisha June ee soo socota.
