Dhoobley(Idaacadda Sanguuni)-Frankfurt ayaa jaratay tikitkeeda wareega Afarta ee Europa League kaddib markii ay ka ciribtirtay Barcelona oo ay kaga soo adkaatay 2-3, kulankii lugta labaad ee wareega siddeeda, iyadoo celcelis ahaan ku soo baxay 3-4.
Qeybta hore ee ciyaarta ayaa lagu kala nastay 0-2 ay ku hoggaamineysay kooxda mrtida ahayd ee Eintracht Frankfurt.
Daqiiqadii 4-aad kooxda kubadda cagta Eintracht Frankfurt ayaa loo dhigay rigoore waxaana gool u badelay laacibkooda Filip Kostić, ciyaarta ayaa waxay sidaas ku noqotay 0-1.
36 daqiiqo marka ay dheesha mareysay kooxda Eintracht Frankfurt ayaa dhalisay goolkeeda labaad ee ciyaarta waxaana 0-2 ka dhigay xiddigooda Rafael Santos Borré oo ay caawin kaga timid saaxiibkiis Filip Kostić.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
Daqiiqadii 67-aad kooxda Eintracht Frankfurt ayaa sii dheereysatay hoggaaminta dheesha kaddib markii uu 0-3 ka dhigay laacibkooda Filip Kostić, waxaana ka caawiyay goolkan Daichi Kamada.
Barcelona ayaa 90 +1 daqiiqo marka ay ciyaarta mareysay waxay dhalisay gool waxaana 1-3 ka dhigay dheesha laacibkooda khadka dhexe ee Sergio Busquets.
Daqiiqadii 90 + 11′ Barcelona ayaa loo dhigay rogoore waxaana gool u badelay weeraryahankooda M. Depay dheesha ayaa waxay sidaas ku noqotay 2-3.
Ugu dambeyntii ciyaarta ayaa ku dhammaatay 2-3 ay kaga soo adkaatay Eintracht Frankfurt kooxda Barcelona oo ay ku booqatay garoonka Camp Nou, taasoo ka caawisay kooxda reer Germany inay iska xaadiriso wareega Afarta ee Europa League maadaama kulankii lugta hore uu ku soo dhammaaday barbardhac 1-1 ah, waxayna celcelis ahaan ku soo baxday 3-4.
