Dhoobley(Idaacadda Sanguuni)-Kooxaha Atletico Madrid iyo Manchester United barbaro ku kala baxay kulanka lugta hore wareega 16-ka ee tartanka Champions League, kaddib markii ay ku kala baxeen 1-1, iyada oo lugta labaad lagu ciyaari doono garoonka Old Trafford ee magaalada Manchester.
Qeybta hore ee ciyaarta ayaa lagu kala nastay 1-0 ay ku hoggaamineysay kooxda martida loo ahaa ee Atletico Madrid.
Daqiiqadii 7-aad kooxda Atletico Madrid ayaa hoggaanka u qabatay dheesha kaddib markii uu 1-0 ka dhigay João Félix waxaana goolkan ka caawiyay saaxiibkiis Renan Lodi.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
80 daqiiqo marka ay ciyaarta mareysay kooxda Manchester United ayaa dhalisay goolka barbardhaca waxaana 1-1 ka dhigay da’ayarkooda Elanga oo caawin ka helay saaxiibkiis B. Fernandes.
Ugu dambeyntii ciyaarta ayaa ku dhammaatay barbardhac 1-1 ah ay ku kala baxeen labada kooxood Atletico Madrid iyo Manchester United, kulanka lugta hore wareega 16-ka ee tartanka Champions League.
Sidoo kale kooxaha Benfica iyo Ajax barbaro ku kala baxay kulanka lugta hore wareega 16-ka ee tartanka Champions League, kaddib markii ay ku kala baxeen 2-2 garbo siman ah.
