Red Devils ayaa booqaneysa naadiga Sheffield United oo xilli ciyaareedkan si aad ah kaga liidata xilli ciyaareedkii hore.
Sheffield ayaa ku jirta booska ugu hooseeya kala sarraynta horyaalka Premier League iyadoo shaqeysatay kaliya hal dhibic, waxayna caawa marti sooreysaa Man United oo 20 dhibcood la fadhisa booska sagaalaad ee kala sarraynta horyaalka.
Ogeysiiska Ciyaarta:-
Tartanka: England – Premier League
Taariikhda: Khamiis 17 Dis 2020
Saacadda ay bilaabaneyso dheesha: 11:00 Habeennimo xilliga geeska Afrika.
Garoonka: Bramall Lane
Garsooraha: Michael Oliver (England)
Wararka Kooxaha:-
Kean Bryan ayaa ka maqnaan doona naadiga Sheffield United isagoo bil ka maqnaan doona garoommada kaddib dhaawac daran oo ka soo gaaray kulankii ay guuldarrada kala kulmeen Southampton.
Waxaa sidoo kale shaki la galinayaa Oli McBurnie oo isla ciyaartaas ku dhaawacmay kaddib markii uu garabka barkaday.
Manchester United weeraryahankeeda Edinson Cavani ayaa la filayaa in kulankan uu seego maadaama uusan si buuxdo taam ugu ahayn ciyaartan.
Marcos Rojo iyo Phil Jones ayaa wali ka sii maqnaan doono kooxda Macallin Ole Gunnar Solskjaer.
Xaqiiqooyinka Ciyaarta:-
Fool Ka Fool
Markii ugu dambeysay ee ay Sheffield garaacdo Manchester United kulan ka tirsan horyaalka waxay ahayd maalintii ugu horreysay ee Premier League bishii Agoosto ee 1992-kii.
Man United ayaa gool ka dhalisay Sheffield mid walba oo ka mid ah 22 jeer oo ay hore u wada ciyaareen dhammaan tartammada, waxaana taariikhdan quruxda badan ay Red Devils soo billawday 1972-kii.
Sheffield United
Sheffield United ayaa la garaacay 10 ka mid ah 11-ka kulan ee ay ka ciyaartay Premier League xilli ciyaareedkan, halka kan kalena ay bareejo gashay.
Chris Wilder kooxda uu hoggaamiyo ayaa ku socota inay siddeed guuldarro oo xiriir ah ka soo gaarto horyaalka, taasoo noqon doonta rikoor liita oo ay sameyneyso.
Waa kooxda labaad ee horyaalka heerka koowaad ee Ingiriiska ka shaqeysatay hal dhibic ama wax ka yar marka la ciyaaro 12 kulan, kooxdii ka horreysayna waxay ahayd Manchester United oo wax dhibic ah aanan helin 12-kii kulan ee ugu horreysay fasalkii 1930-31.
Sheffield United waa kooxda kaliya ee xilli ciyaareedkan aanan marna shabaqeeda difaacanin kulammada horyaalka, halka ay dhaliyeen kaliya shan gool, waana kooxda ugu goolasha yar guud ahaan Premier League.
Tababare Wilder ayaa raadinaya guushiisa boqolaad inta uu macallinka u yahay Sheffield dhammaan tartammada, waxaana uu hadda u jiraa kaliya hal guul.
Manchester United
Man United ayaa guuleysatay dhammaan shantii kulan ee ay bannaanka ku soo ciyaartay horyaalka xilli ciyaareedkan inkastoo gool lagaga hormaray dhammaan kulammadaas, balse waa kooxda kaliya ee rikoor 100% ah ka haysata kulammada bannaanka Premier League xilli ciyaareedkan.
Red Devils ayaa dhalisay 16 gool kulammadaas, mana aysan ku guuldarreysan inay dhaliyaan saddex gool dhammaan kulammadaas.
Manchester United ayaa dooneysa inay noqoto kooxdii afaraad ee taariikhda horyaalka Ingiriiska taasoo toban guul oo xiriir ah ku soo gaarta bannaanka garoonkeeda.
Kooxda Macallin Solskjaer ayaa guuldarro la’aan ah shantii ciyaarood ee ugu dambeysay horyaalka iyadoo gaartay afar guul, midna barbarro gashay.
Bruno Fernandes ayaa gool dhalinayay ama caawinayay 11 ka mid ah 12 kulan oo uu Premier League bannaanka ku soo ciyaaray, waxaana uu diiwaanka ku qortay kulammadaas 11 gool iyo lix caawin.
Anthony Martial ayaanan gool dhalin sagaalkii kulan ee ugu dambeysay horyaalka, waxaana dhanka kale uu dhaliyay saddex gool oo qura 14-kii kulan ee ka dambeeyay markii uu saddexley Old Trafford kaga dhaliyay naadiga ay caawa la ciyaarayaan ee Sheffield kulan dhacay bishii June ee bartamihii sanadkaan.
Shaxda macquulka ah ee labada koox:-
