Dhoobley(Idaacadda Sanguuni)-FC Bayern Munich ayaa wajaheysa hubanti la’aan sii kordheysa oo la xiriirta mustaqbalka Joshua Kimmich, kaasoo qandaraaskiisu dhacayo dhamaadka xilli ciyaareedkan.
Xiddiga 29 jirka ah, ee khadka dhexe xulka Jarmalka ayaa qayb muhiim ah ka ah shaxda kooxda Bavarian ololahaan.
Max Eberl, oo mas’uul ka ah arrimaha isboortiga ee Bayern, ayaa mudnaanta koowaad siiyay dib u cusbooneysiinta qandaraaska Kimmich.
Si kastaba ha ahaatee, horumar la’aanta wadahalka ayaa keentay in la isla dhexmarayo ka tagista kooxda.
Sida laga soo xigtay warbixinnada ‘MundoDeportivo, kooxaha aadka u fiirsanaya xaaladdan waxaa kamid ah Barcelona iyo Manchester City, iyagoo Kimmich u arka fursad qaali ah oo ay ku xoojin karaan kooxahooda.
Barcelona ayaa muddo dheer xiisaynaysay xiddiga heerka caalami ee dalka Jarmalka, waxaana hadda caawin kara tababare Hansi Flick oo xiriir dhaw la leh ciyaaryahanka.
