Dhoobley(Idaacadda Sanguuni)-Hal tababar oo kaliya ayay ku qaadatay Alexis Sanchez inuu garwaaqsado inuu sameeyay qalad markii uu ka tagay Arsenal kuna biiray kooxda Man United.
Sanchez ayaa wacdaro ka dhigay Arsenal muddo 4 sano ah kadib markii uu kaga biiray kooxda Barcelona sanaadkii 2014 waxana uu u dhaliyay 80 gool 166 kulan waxana uu kooxda kula guulaystay 2 FA Cup.
Xiddiga Sanchez ayaa iska diiday in uu lumiyo fursad uu ugu biiri lahaa man United waxana uu Red Devils ku biiray suuqii January ee 2018.
Sanchez ayaa la siiyay Lambarka No.7 laakiin si weyn ayuu ugu fashilmay waxana uu kaliya dhaliyay 5 gool 45 kulan oo uu ciyaaray ka hor inta uuna ku biirin Inter Milan.
Isagoo dib u eegaya u dhaqaaqidiisa Manchester United, Sanchez ayaa yiri:”Waan aqbalay fursada aan ku aadi karo United, waxa aan dareemay soo jiidasho waxana ay ahayd wax ii fiican aniga”.
“Aad ayaan u jeclaa kooxdan markii aan yaraa. Ugu dambeyntii waxan ku biiray Man United ma waraysan waxa ka dhacaya kooxda dhexdeeda”.
“Mararka qaar waxa jira waxyaabo aanad ogaan karin ilaa aad halkaas gaadho, waxaanan xasuustaa tababarkii ugu horeeyay ee aan qaatay, wax badan ayaan ogaaday”.
“tababarkii ugu horeeyay ka dib waxaan ku imid guriga, waxaanan u sheegay qoyskayga iyo wakiilkayga, “Miyaad burburin kartaa qandaraaska si aan ugu laabto Arsenal laakiin way igu qasleen”.
“Waxan u sheegay in ay jiraan wax aan sax ahayn laakiin mar hore ayaan saxiixay mar horeba halkaas ayaan joogay”ayuu sii raaciyay.
