Dhobley(Idaacadda Sanguuni)-Heyada Socdaalka iyo Kastamyada Mareykanka ayaa in ka badan 270,000 oo qof u tarxiilay 192 waddan muddo 12 bilood ah, taasoo ah tiradii ugu badnayd ee sannadle ah tobankii sano ee la soo dhaafay, sida lagu sheegay warbixin la sii daayay Khamiista taasoo muujineysa qaar ka mid ah caqabadaha maaliyadeed iyo kuwa shaqo ee Madaxweynaha la doortay ee Donald Trump uu wajihi doono si uu u fuliyo balan qaadkiisii ahaa masaafurinta dad aad u badan.
Heyada ICE, oo ah hay’adda ugu weyn ee dawladda ee mas’uulka ka ah ka saarista dadka sida sharci-darro ah dalkan ku soo gala ayaa sheegeytey in 271,484 la masaafuriyay sannad maaliyadeedkeeda dhamaaday Sebtembar 30 keedii, ku dhawaad labanlaab marka loo eego 142,580 isla muddadaas sanad ka hor.
Sidoo kale Khamiista, Heyada Kastamyada Mareykanka iyo Ilaalinta Xuduudaha ayaa sheegay in ay xireen 46,612 kuwaasoo si sharci darro ah uga soo gudbey xuduuda Mexico bishii Nofembar, tani waxay hoos u dhacdey 18% marka loo eego 56,526 bil ka hor iyo in ka badan 80% marka loo eego heerkii ugu sarreeyay abid ee 250,000 bishii Diseembar 2023. Dadka ka soo gudbaya xuduuda ayaa hoos u dhacay kala bar markii masuuliyiinta Mexico ay kordhiyeen adkeynta ka soo gudbida xuduudahooda sanad ka hor.
